غیر ملکی سیاح کی ویڈیو پر ایکشن کے بعد عطا آباد جھیل میں سیوریج کا پانی شامل کرنے پر ہنزہ میں واقع ہوٹل کا ایک حصہ سیل کردیا گیا۔
تفصیلات کے مطابق غیر ملکی سیاح کی جانب سے پوری دنیا میں سیاحت کے لحاظ سے مشہور ضلع ہنزہ کے ایک بڑے ہوٹل کا نکاسی آب خوبصورت عطا آباد جھیل میں گرنے کے وی لاگ کے بعد حکومتی ادارے حرکت میں آگئے۔
غیر ملکی سیاح نے سوشل میڈیا پر ایک ویڈیو پوسٹ کی تھی جس میں ہوٹل کے سیوریج کا پانی عطا آباد جھیل میں شامل کرتے دکھایا گیا تھا، غیر ملکی سیاح کی ویڈیو میں دیکھا جاسکتا ہے کہ سیوریج کا پانی شامل ہونے سے عطاآباد جھیل کے پانی کا رنگ تبدیل ہوگیا۔
اس ویڈیو میں غیر ملکی وی لاگر نے عطا آباد جھیل کنارے بنے ہوٹل ہنزہ پر الزام عائد کیا کہ ’وہاں سے سیوریج اور کچن کا آلودہ پانی عطا آباد جھیل میں داخل ہو رہا ہے۔‘
انھوں نے ویڈیو میں جھیل کو دکھاتے ہوئے کہا کہ ’آپ دیکھ سکتے ہیں کہ جھیل کے صاف نیلے پانی اور جہاں پر سیوریج کا پانی چھوڑا گیا ہے وہاں بڑا واضح فرق ہے۔ پانی گدلا ہورہا ہے اور وہ اس (ہوٹل کی) عمارت سے آرہا ہے۔‘
View this post on Instagram
ویڈیو سوشل میڈیا پر وائرل ہونے کے بعد گلگت بلتستان ماحولیاتی تحفظ ایجنسی اور ضلعی انتظامیہ نے ہوٹل کا ایک حصہ سیل کرتے ہوئے ہوٹل پر 15 لاکھ روپے جرمانہ بھی عائد کردیا۔
انتظامیہ نے تمام ہوٹلز کی این او سیز پر نظرثانی کا فیصلہ بھی کیا ہے، انتظامیہ نے اس صورت حال پر سخت افسوس کا بھی اظہار کیا ہے۔
