ٹوکیو : جاپانی لڑکی کے لمبے بالوں نے دیکھنے والوں کو حیرت زدہ کردیا، 20سالہ لڑکی نے اپنے بالوں کو 6 فٹ3انچ تک بڑھا لیا۔
غیرملکی خبر رساں ادارے کی رپورٹ کے مطابق ٹوکیو سے تعلق رکھنے والی ماڈل گرل اور فنکارہ نے بہت محنت سے اپنے بالوں کی لمبائی کو برقرار رکھا ہوا ہے۔
ماڈل گرل کا کہنا ہے کہ اپنے لمبے بالوں کی صحت اور خوبصورتی کو برقرار رکھنا بہت مشکل ہوتا ہے، بالوں کی دیکھ بھال کے لیے زعفران اور آئرن کا استعمال کرتی ہوں۔
میڈیا سے گفتگو کرتے ہوئے اس نے کہا کہ دنیا میں ایسے لوگ بھی ہیں جو میرے بالوں کی تعریف کرتے ہیں اور کچھ ایسے لوگ بھی ہیں جو سمجھتے ہیں کہ یہ کوئی بلا ہے۔
واضح رہے کہ دنیا میں سب سے زیادہ لمبے بال رکھنے والی 18 سالہ لڑکی نیلانشی پٹیل ہے جس نے تیسری بار بھی اپنا ہی عالمی ریکارڈ توڑ دیا تھا۔
بھارتی ریاست گجرات کے علاقے موداسہ سے تعلق رکھنے والی نیلانشی پٹیل نے اس سے قبل 2018 میں گینزبک آف ورلڈ ریکارڈ میں اپنا نام درج کرایا تھا، جس کے بعد انہوں نے اگلے سال پھر اپنا ہی ریکارڈ برابر کیا۔
گزشتہ برس نیلاشی کی عمر 17 سال جبکہ اُن کے بالوں کی لمبائی 6 فٹ 2 انچ تھی، اس سے قبل دسمبر 2018میں جب اُن کی عمر 16 سال تھی تو اُن کے بال پانچ فٹ 6 انچ لمبے تھے۔
مزید پڑھیں : اٹھارہ سالہ لڑکی کے 6 فٹ 7 انچ لمبے بال
تیسری بار سال 2020 میں جب نیلانشی 18 برس کی ہوئیں تو انہوں نے سب سے لمبے بال رکھنے والی نوجوان لڑکی کا اعزاز اپنے نام کرتے ہوئے ایک بار پھر گنیز بک آف ورلڈ ریکارڈ میں نام درج کرایا۔
