سان فرانسسکو کے ماڈرن آرٹ کے میوزیم میں اس وقت ایک مضحکہ خیز صورتحال پیش آئی جب شرارت کے طور پر رکھے ہوئے ایک چشمے کو لوگوں نے آرٹ کا نمونہ سمجھ کر اس پر غور و فکر شروع کردیا اور اس کی تصاویر کھینچیں۔
یہ شرارت ایک 17 سال لڑکے ٹی جے نے کی۔ اس کا کہنا ہے کہ جب وہ نمائش کو دیکھنے کے لیے وہاں گیا تو اسے ماڈرن آرٹ کے نام پر عجیب و غریب چیزیں دکھائی دیں جو اسے بالکل پسند نہیں آئیں۔ ’حیرت کی بات یہ تھی کہ وہاں موجود تمام لوگ اس میں دلچسپی لے رہے تھے‘۔
اس نے لوگوں کی صلاحیت کو آزمانے کے لیے شرارت کے طور پر اپنا چشمہ فرش پر رکھ دیا اور چھپ کر لوگوں کے تاثرات دیکھنے لگا۔ تھوڑی ہی دیر میں آرٹ کے دیوانے وہاں جمع ہوگئے اور اس چشمہ کو بغور دیکھنے لگے۔ کچھ نے اس چشمہ کی تصاویر بھی اتاریں۔
ٹی جے کا کہنا ہے کہ شایہ لوگ یہ سمجھے کہ فرش پر چشمے کے ذریعے ’نچلی سطح سے دنیا کو دیکھنے‘ کے خیال کو اجاگر کیا گیا ہے۔
تاہم ٹی جے کو ماڈرن آرٹ سے کوئی پرخاش نہیں۔ وہ کہتا ہے کہ آرٹ جذبات کے اظہار کا نام ہے۔ ہر شخص کا آرٹ اس کی اندر کی کشمکش کو ظاہر کرتا ہے۔ یہ اپنے خیالات و جذبات کو پر امن طریقے سے دنیا کے سامنے پیش کرنے کا بہترین ذریعہ ہے۔
