ایران کے میزائل حملوں کے بعد عالمی منڈی میں تیل کی قیمتوں میں تقریباً 5 فیصد کمی سامنے آئی ہے جبکہ امریکی اسٹاک مارکیٹ میں اضافہ دیکھا گیا۔
غیر ملکی میڈیا رپورٹ کے مطابق ایران کی جانب سے قطر میں موجود امریکی فوجی اڈے پر حملے کے بعد عالمی مارکیٹ میں تیل کی قیمتوں میں کمی آگئی۔
برینٹ کروڈ کی قیمت میں تقریباً5فیصد کمی سامنے آئی ہے جس کے بعد برینٹ کروڈ 72ڈالرفی بیرل سے بھی نیچے آگیا۔
امریکی خام تیل ڈبلیو ٹی آئی 6.32 فیصد کی کمی کے بعد 69.17 ڈالر فی بیرل میں فروخت ہو رہا ہے۔
سرمایہ کاروں کو امید ہے کہ امریکہ کی جانب سے ایران کی نیوکلیئر تنصیبات پر حملوں کے بعد پیدا ہونے والی کشیدگی قابو میں رہے گی اور بڑے پیمانے پر معاشی بحران نہیں آئے گا۔
یہ امید اس وقت اور بھی مضبوط ہوگئی جب ایران نے قطر میں موجود ایک امریکی فوجی اڈے پر حملہ کیا مگر حملے سے پہلے ہی امریکی حکام کو خبردار کر دیا گیا تھا۔
نیویارک ٹائمز کو ایرانی حکام نے بتایا کہ انہوں نے پہلے سے اطلاع دے دی تھی تاکہ جانی نقصان کم سے کم ہو۔
مزید پڑھیں : ایران کے مشرقِ وسطیٰ میں امریکی اڈوں پر حملے
واضح رہے کہ ایران نے قطر اور عراق میں امریکی اڈوں پر بیلسٹک میزائل فائر کیے ہیں، امریکی میڈیا رپورٹ کے مطابق ایران کی جانب سے قطر کی جانب 6 بیلسٹک میزائل فائر کیے گئے۔
عرب میڈیا کے مطابق قطر کے دارالحکومت دوحا میں زور دار دھماکے سنے گئے۔ ایرانی میزائلوں کے داغے جانے کے بعد دوحا میں دفاعی نظام متحرک کردیا گیا ہے۔
اسرائیلی میڈیا کا کہنا ہے کہ ایران نے قطر میں امریکی فوجی اڈے پر 6 اور عراق میں ایک میزائل داغا ہے۔ قطر نے پہلے ہی اپنی فضائی حدود کو عارضی طور پر بند کر دیا تھا۔
