عالمی موسمیاتی تبدیلی کے اثرات نے امریکا اور یورپ کو بھی پوری طرح اپنی لپیٹ میں لے لیا ہے اور وہاں گرمی کی شدید ترین لہر جاری ہے۔
غیر ملکی میڈیا کے مطابق امریکی دارالحکومت واشنگٹن میں درجہ حرارت 37 ڈگری سینٹی گریڈ سے تجاوز کر گیا ہے جب کہ شمالی اور جنوبی ریاستوں میں بھی شدید گرمی کی لہر برقرار ہے۔
امریکی ریاستوں ایریزونا، نیو میکسیکو، ٹیکساس، کولوراڈو اور کنساس میں درجہ حرارت 37 سے 43 ڈگری سینٹی گریڈ کے درمیان ریکارڈ جب کہ محکمہ موسمیات نے ہیٹ وارننگ جاری کر دی ہے۔
نیشنل ویدر سروس نے گرمی سے ہزاروں افراد کے متاثر ہونے کا خدشہ بھی ظاہر کیا ہے جب کہ راک ویلی میں طوفان، سیلاب اور بگولوں کے خدشے کے پیش ِ نظر شہریوں کو گھروں میں رہنے کی ہدایات جاری کی گئی ہیں۔
دوسری جانب یورپ کے بیشتر شہروں میں گرمی کی لہر میں تیزی آگئی ہے۔ اسپین مں پارہ 39 ڈگری کو چھو گیا۔ اٹلی میں بھی درجہ حرارت 40 ڈگری سینٹی گریڈ ریکارڈ کیا گیا ہے۔
گرمی سے بے حال شہریوں نے واٹر پارکس، ساحل سمندر اور ٹھنڈے مقامات کا رخ کر لیا ہے۔
