بینک دولتِ پاکستان مویشی منڈیوں میں رقم کی ڈجیٹل طریقے سے ادائیگی کو فروغ دینے کے لیے ملک گیر مہم کا آغاز کر رہا ہے جس میں صفِ اول کے 22 کمرشل بینکوں کے ساتھ اس کا اشتراک ہے۔
15 مئی سے 6 جون 2025ء تک چلنے والی اس مہم کا مقصد خریداروں اور فروخت کنندگان کو یہ ترغیب دینا ہے کہ قربانی کے جانور خریدنے کے لیے اور خوراک، پانی، اور پارکنگ جیسی متعلقہ سہولتیں لینے کے لیے ادائیگی کے ڈجیٹل طریقے استعمال کیے جائیں۔
یہ اقدام ملک بھر میں ڈجیٹل ادائیگیوں کو مقبولِ عام بنانے کے اسٹیٹ بینک کے وسیع تر اسٹریٹجک ہدف کا ایک حصہ ہے۔ گذشتہ سال مہم کی کامیابی 2025ء کی اس مہم کے لیے مہمیز ثابت ہوئی۔ یاد رہے کہ 2024ء میں 4 ہزار سے زائد تاجر اس مہم کا حصہ بنے اور 560 ملین روپے مالیت کی 13 ہزار ڈجیٹل ٹرانزیکشن عمل میں آئیں۔ 2025ء کی مہم میں 21 اضلاع کی 54 بڑی مویشی منڈیوں کو شامل کیا جائے گا۔ مہم کے دوران ایک لاکھ ڈجیٹل ٹرانزیکشن عمل میں لانا اِس سال کا ہدف ہے۔ عام لوگوں اور تاجروں کی طرف سے ملنے والا ردِعمل نہایت مثبت رہا ہے جس سے روایتی بازاروں میں بھی خریدوفروخت میں بے نقد (کیش لیس) طریقوں کی طلب کا اظہار ہوتا ہے۔
پوری مہم کے دوران بڑی رقوم کے سودوں کو سہولت پہنچانے کے لیے ٹرانزیکشن کی حد میں اضافہ کردیا گیا ہے۔ آگاہی بڑھانے، تاجروں کو اپنے ساتھ شریک کرانے، اور کیو آر کوڈ، موبائل والٹ، اور بینکنگ ایپس جیسے طریقے اپنانے میں خریداروں کو مدد دینے کی غرض سے منڈیوں میں معاون ٹیمیں اور ڈجیٹل طریقے استعمال کیے جائیں گے۔
