لاہور: وفاقی وزیر ریلوے خواجہ سعد رفیق کی ریلوے اسٹیڈیم آمد کے موقع پر کھلاڑیوں نے گو نواز گو کے نعروں سے اُن کا استقبال کیا، پولیس نے چار کھلاڑیوں کو گرفتار کیا جنہیں وزیر اعظم کی ہدایت پر رہا کردیا گیا۔
تفصیلات کے مطابق وفاقی وزیر ریلوے خواجہ سعد رفیق تقریب کے لیے لاہور کے ریلوے اسٹیڈیم پہنچے تو وہاں موجود ریلوے کے کھلاڑیوں نے اُن کا ’’گو نواز گو‘‘ کے نعروں سے استقبال کیا۔
اسی دوران طلبہ نے بھی نوازشریف کی مخالفت میں نعرے لگانے شروع کیے تو انتظامیہ پریشان ہوگئی اور پولیس کو طلب کرلیا، پولیس نے طلباء کو منتشر کرنے کی کوشش کی اور طلبہ کو اسٹیڈیم سے باہر نکالا۔
ویڈیو دیکھیں
بعد ازاں پولیس 3 لڑکوں کو موبائل میں بیٹھا کر اپنے ہمراہ لے گئی تاہم اس دوران صحافیوں کی جانب سے پاناما لیکس سے متعلق پوچھے گئے سوالات پر خواجہ سعد رفیق اٹھ کر چلے گئے۔
بعد ازاں وزیر اعظم میاں محمد نوازشریف نے کھلاڑیوں کی گرفتاری کا نوٹس لیتے ہوئے اُن کی فوری رہائی کے احکامات جاری کیے، جس کے بعد کھلاڑیوں کو رہا کردیا گیا۔
