کراچی: آج کاروباری دن کے دوران پاکستان میں فی تولہ سونے کی قیمت 2 لاکھ 73 ہزار 400 روپے پر برقرار رہی۔
آل پاکستان جیمز اینڈ جیولرز ایسوسی ایشن کے مطابق 10 گرام سونے کی قیمت 2 لاکھ 34 ہزار400 روپے پر برقرار ہے اور اس میں کوئی ردو بدل دیکھنے میں نہیں آیا، ملک میں فی تولہ سونا 2 لاکھ 73 ہزار 400 روپے میں دستیاب رہا۔
جیولرز ایسوسی ایشن کی جانب سے مزید بتایا گیا کہ عالمی بازار میں سونے کی قیمت 2 ہزار 622 ڈالرز فی اونس پر برقرار ہے جس کے باعث پاکستان میں بھی سونے کی قیمت برقرار رہی۔
یاد رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
