کراچی: عالمی اور مقامی مارکیٹ میں ایک بار پھر سونے کی قیمت میں بڑا اضافہ ہوگیا، سونا کی قیمت بلند سطح پرپہنچ گئی۔
آل پاکستان جیمز اینڈ جیولرز ایسوسی ایشن کے مطابق اس وقت ملک میں فی تولہ سونا 2500 روپے اضافے سے 2 لاکھ 60 ہزار 200 روپے کا ہوگیا ہے، 10 گرام سونا 2144 روپے کے اضافے سے 2 لاکھ 23 ہزار 80 روپے کا ہوگیا ہے،
عالمی صرافہ بازار میں سونے کی قیمت بلندی کی جانب گامنز ہے جو کہ 50 ڈالرز کے اضافے سے فی اونس 2950 ڈالرز کی سطح پرآگئی ہے۔
خیال رہے سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
سونے کو صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدتے ہیں۔
پاکستان میں گذشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی ہے۔
