کراچی : پاکستان میں سونے کی قیمت میں اضافے کا نیا ریکارڈ قائم ہوگیا اور فی تولہ سونا 3 لاکھ 50 ہزار کے قریب پہنچ گیا۔
تفصیلات کے مطابق دنیا میں سونے کی قیمتوں کو پر لگ گئے اور چوبیس قیراط فی تولہ سونے کی قیمت تاریخ کی نئی بلند ترین سطح پر پہنچ گئی۔
پاکستان میں سونے کی فی تولہ قیمت میں آج 8600 روپے کا بڑا اضافہ ہوا اور فی تولے کی قیمت 3 لاکھ 48 ہزار روپے کی تاریخی سطح پر جا پہنچی۔
دس گرام سونا 7 ہزار تین 373 روپے مہنگا ہو کر 2 لاکھ 98 ہزار 353 روپے کا ہوگیا۔
بین الاقوامی مارکیٹ میں سونا چھیاسی ڈالر اضافے کے ساتھ پہلی بار 3310 ڈالر فی اونس پر پہنچ گیا۔۔
واضح رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدتے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
