کراچی : ملک میں گزشتہ دنوں سونے کی قیمت میں اضافے کے بعد نہ صرف عالمی بلکہ مقامی مارکیٹ میں بھی کمی واقع ہونا شروع ہوگئی، فی تولہ قیمت میں دو ہزار روپے کی کمی سامنے آئی ہے۔

تفصیلات کے مطابق پاکستان اور عالمی مارکیٹ میں سونے کی قیمت میں غیرمعمولی کمی سامنے آئی ہے، کاروباری ہفتے کے پہلے روز بڑی کمی ریکارڈ کی گئی ہے، فی تولہ سونا 2 ہزار روپے جبکہ فی اونس 8 ڈالر سستا ہوگیا۔

آل پاکستان جیولرز مینوفیکچررز ایسوسی ایشن کی جانب سے جاری کردہ اعداد و شمار کے مطابق 2ہزارروپے کی کمی کے بعد فی تولہ سونے کی قیمت ایک لاکھ 98ہزار روپے ہوگئی جبکہ 10گرام سونے کی قیمت 1715روپے کم ہوکر ایک لاکھ69ہزار 753ہوگئی ہے۔

عالمی مارکیٹ میں بھی سونا 8 ڈالر کی کمی سے ایک ہزار 849 ڈالر کا ہوگیا، ملک بھر میں فی تولہ چاندی دو ہزار 140 روپے اور دس گرام 1834.70 روپے میں فروخت ہورہی ہے۔