کراچی : پاکستان میں سونے کی قیمت بلند ترین سطح پر پہنچنے کے بعد اچانک نیچے آگئی، آج فی تولہ قیمت میں بڑی کمی ہوئی۔
تفصیلات کے مطابق عالمی اور مقامی منڈیوں میں سونے کی قیمتوں میں اضافے کے بعد اچانک کمی ریکارڈ کی گئی، گذشتہ دونوں سونا بلند ترین سطح پر پہنچ گیا تھا۔
پاکستان جیمز اینڈ جیولر ایسوسی ایشن نے بتایا کہ ملک میں سونے کی فی تولہ قیمت میں 2500 روپے کی کمی ہوئی، جس کے بعد سونا 2 لاکھ 84 ہزار 700 روپے فی تولہ ہوگیا۔
اسی طرح 10گرام سونےکی قیمت میں 2144 روپے کی کمی ریکارڈ کی گئی اور سونا 2 لاکھ 44 ہزار 84 کا ہوگیا جبکہ چاندی کی فی تولہ قیمت 20 روپے کمی کے بعد 3430 روپے ہوگئی
عالمی مارکیٹ میں سونا 25 ڈالرز کی کمی سے 2752 ڈالر فی اونس کی سطح پر آگیا۔
واضح رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔
پاکستان میں گذشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
