کراچی : پاکستان میں سونے کی قیمت کے تمام سابقہ ریکارڈ ٹوٹ گئے اور فی تولہ سونا تاریخ کی بلند ترین سطح پر پہنچ گیا۔
تفصیلات کے مطابق عالمی مارکیٹ میں سونے کی قیمتوں میں اضافے کی وجہ سے پاکستان کے صرافہ بازاروں میں بھی سونے کی قیمتوں میں اضافے کا رجحان برقرار ہے۔
پاکستان میں فی تولہ قیمت میں 1700 روپے اضافہ ہوا اور سونا تاریخ کی بلند ترین سطح 2 لاکھ 68 ہزار روپےپر جا پہنچا۔
دس گرام سونا 1458 روہے اضافے سے 2 لاکھ 29 ہزار 767 روپے کا ہوگیا
بین الاقوامی مارکیٹ میں سونے کی قیمتوں تاریخ کی بلند ترین سطح پر پہنچ گئی، قیمت میں 10 ڈالر فی اونس کا اضافہ ہوا، جس کے بعد بین الاقوامی مارکیٹ میں سونا 2587 ڈالر پر پہنچ گیا۔
واضح رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدتے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
