پاکستان میں عیدالفطر کی تعطیلات کے بعد مسلسل کمی کے بعد منگل تک سونے کی فی تولہ قیمت میں مجموعی طور پر 7 ہزار روپے کمی ہو چکی ہے۔
منگل کے روز عالمی مارکیٹ میں سونا 28 ڈالر کمی کے بعد 3010 ڈالر فی اونس ہو گیا۔ اس گراوٹ کا اثر پاکستان میں بھی سونے کی قیمت پر نظر آیا۔
آل پاکستان جیمز اینڈ جیولرز ایسوسی ایشن کے مطابق منگل کے روز پاکستان میں فی تولہ سونے کی قیمت میں دو ہزار روپے کی کمی ریکارڈ کی گئی جس کےبعد فی تولہ سونا کم ہو کر 3 لاکھ 18 ہزار روپے ہو گیا ہے۔
اسی تناسب سے 10 گرام سونےکی قیمت میں 1715 روپے کمی واقع ہونے کے بعد قیمت 2 لاکھ 72 ہزار 633 روپے ہو گئی ہے۔
واضح رہے کہ عیدالفطر کی تعطیلات سے قبل سونے کاروباری ہفتےکے آخری روز 29 مارچ کو 1620 روپے اضافے کے بعد سونےکی فی تولہ قیمت 3 لاکھ 25 ہزار 500 روپے تک جا پہنچی تھی۔
تاہم عیدالفطر کی تعطیلات کے بعد اس قیمتی دھات کی قیمت میں مسلسل گرواٹ سامنے آئی ہے۔ 5 اپریل کو اس کی قدر میں ریکارڈ 5500 روپے کی کمی ہوئی تھی جس کے بعد اس کی قیمت 3 لاکھ 20 ہزار روپے ہو گئی تھی۔
واضح رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
