پاکستان میں تین روز تک سونے کی قیمتوں میں مسلسل کمی کے بعد آج ایک بار پھر اس میں بڑا اضافہ ریکارڈ کیا گیا ہے۔
اے آر وائی نیوز کےمطابق عیدالفطر کے بعد سونے کی قیمتوں میں مسلسل گراوٹ کے بعد بدھ کے روز اس کی قیمت میں بڑا اضافہ سامنے آیا ہے۔
بدھ کے روز عالمی مارکیٹ میں سونا 30 ڈالر کے اضافے سے 3040 ڈالر فی اونس کا ہوگیا۔ اس کا اثر پاکستان کی مارکیٹ پر بھی پڑا۔
آل پاکستان جیمز اینڈ جیولرز ایسوسی ایشن کے مطابق بدھ کجے روز سونے کی فی تولہ قیمت میں 3 ہزار روپے اضافہ ہوا ہے، جس کے بعد سونےکی فی تولہ قیمت 3 لاکھ 21 ہزار تک جا پہنچی ہے۔
اسی تناسب سے 10 گرام سونے کی قیمت بھی 2572 روپے اضافے کے ساتھ 2 لاکھ 75 ہزار 205 روپے ہوگئی ہے۔
واضح رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
