پاکستان میں فی تولہ سونے کی قیمت میں 900 روپے کا اضافہ ریکارڈ کیا گیا۔

آل پاکستان جیمز اینڈ جیولرز ایسوسی ایشن کے مطابق پاکستان میں فی تولہ سونا 900 روپے مہنگا ہوکر 3 لاکھ 36 ہزار 100 روپے کا ہوگیا۔

اسی طرح 10 گرام سونا 772 روپے اضافے سے 2 لاکھ 88 ہزار 151 روپے کا ہوگیا ہے۔

عالمی مارکیٹ میں سونے کی قیمت میں اضافے کا رجحان رہا، سونا 9 ڈالر مہنگا ہوکر 3177 ڈالر فی اونس کی سطح پر آگیا۔

پاکستان میں آج ڈالر اور دیگر کرنسیوں کی قیمت

واضح رہے کہ گذشتہ ماہ سونے کی قیمت نے پاکستان میں تاریخ کی بلند ترین سطح کو چھو لیا تھا اور فی تولہ قیمت 3 لاکھ 63 ہزار روپے سے بھی تجاوز کر گئی تھی۔

خیال رہے سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔

اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدتے ہیں۔

پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔