کاروباری ہفتے کے دوسرے روز پاکستان میں سونے کی قیمت میں بڑی کمی ریکارڈ کی گئی ہے۔

آل پاکستان جیمز اینڈ جیولرز ایسوسی ایشن کے مطابق پاکستان میں آج فی تولہ سونے کی قیمت 2700 روپے کمی کے بعد 2 لاکھ 86 ہزار 400 روپے ہوگئی۔

اسی طرح 10 گرام سونے کی قیمت 2 ہزار 315 روپے کم ہوکر 2 لاکھ 45 ہزار 541 روپے رہی۔

عالمی مارکیٹ میں بھی سونے کی قیمت 26 ڈالر کم ہوگئی جس کے بعد سونا 2741 ڈالر فی اونس رہا۔

پاکستان میں آج ڈالر اور دیگر کرنسیوں کی قیمت

واضح رہے کہ گزشتہ روز بھی پاکستان میں فی تولہ سونے کی قیمت 300 روپے کمی سے 2 لاکھ 89 ہزار 100 روپے ہوگئی تھی۔

سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔

اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدتے ہیں۔

پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔