کراچی: پاکستان میں سونے کی فی تولہ قیمت میں یکمشت 1500 روپے کا اضافہ ہو گیا ہے۔
آل پاکستان جیمز اینڈ جیولرز ایسوسی ایشن کے مطابق آج سونا فی تولہ 1500 روپے اضافے سے 3 لاکھ 1 ہزار 500 روپے ہو گیا، جب کہ 10 گرام سونے کی قیمت میں 1286 روپے کے اضافے کے ساتھ 2 لاکھ 58 ہزار 487 روپے پر پہنچ گیا۔
اسی طرح عالمی مارکیٹ میں سونا 12 ڈالر اضافے سے 2869 ڈالر فی اونس کا ہو گیا، جب کہ چاندی فی تولہ 30 روپے اضافے سے 3 ہزار 270 روپے کی سطح پر آ گئی۔
یاد رہے کہ سونا خریدنا روایتی طور پر محفوظ سرمایہ کاری سمجھا جاتا ہے، جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کر دی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
