دبئی: متحدہ عرب امارات کے وفاقی ادارے برائے شناخت و شہریت نے گولڈن ویزہ کے خواہشمندوں کے لیے ویب سائٹ متعارف کروادی۔
خلیجی میڈیا کے مطابق سرمایہ کار، کاروباری حضرات، خصوصی ہنر مند، باصلاحیت و ذہین افراد اور محققین طویل مدتی گولڈن ویزہ کے حصول کے لیے درخواست دے سکتے ہیں۔
اہل امیدوار ویب سائٹ کے ذریعے آن لائن فارم جمع کرواسکتے ہیں اور متعلقہ سرکاری ادارے اس درخواست کا جائزہ لیں گے کہ آیا امیدوار اہلیت پر پورا اترتا ہے کہ نہیں۔
یہ ویب سائٹ متعارف کروائے جانے کے بعد سے پوری طرح فعال ہے، بزنس ویزہ سے کاروباری افراد کو یو اے ای میں بزنس کی آزادی کی حاصل ہوگی تاکہ وہ اپنا اور اہل خانہ کا مستقبل محفوظ بنا سکیں۔
اس حوالے سے چیئرمین فیڈرل اتھارٹی برائے شناخت و شہریت علی محمد الشمسی کا کہنا ہے کہ اس ویب سائٹ کے ذریعے کاروباری حضرات کو مزید سروسز اور سہولیات میسر آئیں گی جب کہ بہت سے مراحل بھی کم ہو جائیں گے۔
گولڈن ریزیڈینسی ویزہ یا گولڈ کارڈ کے حامل افراد 5 سے 10 سال تک یو اے ای میں رہائش اختیار کرسکتے ہیں تاہم اس کے لیے کچھ شرائط و ضوابط لاگو ہیں جس پر پورا اترنے والوں کی مدت معیاد کی ازخود تجدید ہوجائے گی۔
گولڈ ویزہ پراسس رواں سال کی 21 مئی سے شروع کیا گیا تھا اور جنرل ڈائریکٹر برائے ریذیڈینس و فارن افیئرز نے 6ہزار 8 سو ویزہ کارڈ کے اجرا کا ہدف مقرر کر رکھا ہے۔
ویب سائٹ: https://business.goldenvisa.ae/
