کوئٹہ : بلوچستان میں 2022 کے زلزلہ متاثرین کے لئے ایف سی مسیحا بن گئی ، ایف سی نے زلزلہ متاثرہ خاندانوں کیلئے اپنی مدد آپ کے تحت گھروں کی تعمیر کرائی۔
تفصیلات کے مطابق بلوچستان کے ضلع ہرنائی میں زلزلہ متاثرین کی بحالی کیلئے سیکیورٹی فورسز نے احسن اقدام اٹھاتے ہوئے زلزلہ متاثرہ خاندانوں کیلئے اپنی مدد آپ کے تحت گھروں کی تعمیر کرائی اور فری میڈیکل کیمپس کے ذریعے ہزاروں زلزلہ متاثرین کا علاج معالجہ بھی کیا گیا۔
ایف سی بلوچستان نارتھ کی جانب سےمتاثرہ 8 خاندانوں کیلئے نئے گھر تعمیرکئے جا چکےہیں ، ان خاندانوں میں بیوائیں اور مقامی باشندہ بشیراحمد شامل ہیں، ان بیواؤں کے خاوند زلزلے کے دوران شہید ہوگئے تھے کوئی کفیل نہ تھا۔
بیوہ بینظیر نے بتایا کہ میرا گھر گر گیا تھا،ایف سی نے گھر بنا کر دیا، مالی امداد فراہم کی، میرے بچے اسکول پڑھ رہے ہیں، اللہ کے بعد ایف سی نے ہماری امداد کی۔
ایک اور بیوہ زرتاش بی بی کا کہنا تھا کہ زلزلے کے بعد میں بے یارو مددگار تھی، ایف سی نے ہمیں گھر بنا کر دیا، ایف سی ہمیں راشن دیتی ہے اور بچوں کی دیکھ بھال کررہی ہے، میں ایف سی کی بہت شکرگزار ہوں۔
زلزلہ متاثر بشیر احمد نے کہا کہ زلزلے میں میرا گھر تباہ ہوگیا تھا، بچے اور بیوی شہید ہوگئے، ایف سی نے مجھے گھر بنا کر دیا اور دکان بنا کر دی، زندگی بہتر ہوگئی ہے۔
ضلع ہرنائی میں بحالی کے سفرمیں متاثرہ خاندانوں کی امداد آج بھی جاری ہے، زلزلہ متاثرین کو ماہانہ مالی امداد، فری راشن اور ان کے بچوں کو تعلیم بھی فراہم کی جارہی ہے۔
