ڈرائیونگ لائسنس بنوانے کے لیے طویل قطاریں اور ہجوم کو کم کرنے کے لیے ملک کے سب سے بڑے شہر کراچی میں مزید لائسنس برانچز کھولنے کا فیصلہ کیا گیا ہے۔
دو کروڑ سے زائد آبادی والے شہر کے باسیوں کی پریشانی کو مدنظر رکھتے ہوئے ٹریفک پولیس نے 2 مزید ڈرائیونگ لائسنس برانچز کے لیے مقامات کا انتخاب کر لیا ہے جس کے بعد دور دراز سے آنے والے شہریوں کو قطاریں لگانے اور رش سے بچنے میں مدد ملے گی۔
ڈی ایس پی ڈرائیونگ لائسنس برانچ کلفٹن عمران صدیقی کا کہنا ہے کہ ایک برانچ ملیر اور دوسری بلدیہ میں کھولی جائے گی، دو نئی برانچز کے بعد شہر میں ڈرائیونگ لائسنس برانچز کی تعداد 5 ہو جائے گی۔
انہوں نے بتایا کہ برانچز کھولنے کے لیے قانونی کارروائیاں مکمل کر لی گئی ہیں اور 2 ماہ کے اندر برانچز فعال ہو جائیں گی اور شہریوں کو لائسنس کا اجرا شروع ہو جائے گا۔
