دوسرے ٹی ٹوئنٹی وہیل چیئر کرکٹ ایشیا کپ کی میزبانی پاکستان کو مل گئی ہے ٹورنامنٹ آئندہ سال جنوری فروری میں منعقد ہوگا۔
اے آر وائی نیوز کے مطابق دوسرے ٹی ٹوئنٹی وہیل چیئر کرکٹ ایشیا کپ کی میزبانی دفاعی چیمپئن پاکستان کو مل گئی ہے ٹورنامنٹ آئندہ برس جنوری فروری میں ہوگا۔
ترجمان پاکستان وہیل چیئر کرکٹ کونسل نے بتایا کہ اس بات کا فیصلہ دوسرے سالانہ اجلاس میں کیا گیا۔
ترجمان کے مطابق ویڈیو لنک پر ہونے والے اجلاس میں پاکستان کو میزبانی کی منظوری دی گئی۔
ترجمان نے بتایا کہ دوسرےٹی20ایشیاکپ میں8ایشیائی ممالک کی ٹیمیں شرکت کرینگی۔
جو ٹیمیں اس ٹورنامنٹ میں شرکت کریں گی ان میں پاکستان کے علاوہ بھارت، بنگلادیش، نیپال، افغانستان، سری لنکا،ایران اور کمبوڈیا شامل ہیں۔
ترجمان کے مطابق ایشیا کپ آئندہ سال جنوری اور فروری میں پاکستان کے5 شہروں میں منعقدہوگا۔
پاکستان اس ٹورنامنٹ میں اپنے اعزاز کا دفاع کرے گا۔
واضح رہے کہ پہلا ٹی ٹوئنٹی وہیل چیئر کرکٹ ایشیا کپ پاکستان نے جیتا تھا۔
یہ ٹورنامنٹ نیپال کے دارالحکومت کھٹمنڈو میں کھیلا گیا تھا جس میں پاکستان کے علاوہ بھارت، بنگلہ دیش اور نیپال کی ٹیموں نے شرکت کی تھی۔
فائنل میں پاکستان نے روایتی حریف بھارت کو شکست دے کر ایشیائی چیمپئن کا اعزاز حاصل کیا تھا۔
بھارت نے پہلے کھیلتے ہوئے مقررہ 20 اوورز میں 212 رنز بنائے تھے، جواب میں پاکستان نے محمد لطیف کی شاندار سنچری کی بدولت مطلوبہ ہدف 5وکٹوں کے نقصان پر حاصل کرلیا تھا۔
محمد لطیف نے 62 گیندوں پر 152 رنز کی دھواں دھار اننگ کھیلی تھی۔
