موبائل فون پاس ہو اور سگنل نہ آ رہے ہیں تو لوگوں کو رابطوں میں مشکل ہوتی ہے لیکن خوشخبری ہے کہ اب یہ مشکل بھی حل ہونے والی ہے۔
موبائل فون سادہ ہو، اینڈرائیڈ یا آئی فون۔ اس کے کام کرنے کے لیے سگنل کی بلاتعطل فراہمی لازمی ہے۔ سگنل نہ ہونے پر بالخصوص بند مقامات پر موبائل فون کام نہیں کرتے اور لوگوں کو رابطوں سمیت اپنے دیگر امور نمٹانے میں مشکلات کا سامنا کرنا پڑتا ہے۔
تاہم اب اچھی کی خبر ہے کہ موبائل فون سگنل کے بغیر بھی چلیں گے۔
غیر ملکی میڈیا کے مطابق ایلون مسک کی اسپیس ایکس کی جانب سے ’ڈائریکٹ ٹو سیل‘ نامی سیٹلائٹ سروس کے ذریعے صارفین آئی فونز اور اینڈرائیڈ اسمارٹ فونز سے اب زمین کے کسی بھی کونے سے کہیں بھی کال کرنا ممکن ہو گیا ہے۔
رپورٹ کے مطابق اس سہولت کے لیے اسمارٹ فونز میں کسی قسم کی تبدیلی کی ضرورت نہیں ہو گی بلکہ صرف ڈیوائس میں ایل ٹی ای سپورٹ ہونا ہی کافی ہوگا۔
اس سروس کے لیے سیٹلائٹس میں ایسے موڈیم نصب کیے گئے ہیں جو انہیں کسی موبائل ٹاور کی طرح کام کرنے میں مدد فراہم کرتے ہیں اور وہ خلا سے براہ راست اسمارٹ فونز میں فون سگنل بیم کرتے ہیں۔
آغاز میں اس سروس میں میسجنگ کی سہولت دستیاب ہو گی اور بعد ازاں وائس اور ڈیٹا سروسز کو بھی اس کا حصہ بنایا جائے گا۔
یوکرین ان اولین ممالک میں سے ایک ہوگا جہاں یہ سروس متعارف کرائی جائے گی۔ اسی مقصد کے لیے یوکرین کے موبائل آپریٹر Kyivstar نے اسٹار لنک کے ساتھ معاہدہ کیا ہے۔
