واشنگٹن : گوگل کروم نے صارفین کی مشکل آسان کردی، متعدد ٹیبز کو کنٹرول کرنے کےلیے کروم نے ایک بٹن متعارف کروا دیا۔
تفصیلات کے مطابق ویب براﺅزنگ کے دوران اکثر افراد بہت آسانی سے بھول جاتے ہیں کہ کس ٹیب میں ویڈیو یا گانے چل رہے ہیں اور اگر متعدد ٹیبز اوپن کر رکھی ہیں تو ویڈیو یا آڈیو کو فوری روکنا مشکل ہوجاتا ہے مگر اب گوگل کروم نے اس مسئلے کو حل کردیا گیا ہے۔
کروم انتظامیہ کی جانب سے ایک اپ ڈیٹ کے ذریعے بٹن متعارف کرایا جارہا ہے جو براﺅزر میں چلنے والی میڈیا فائلز کو پلے یا اسٹاپ کو ممکن بنائے گا۔
میڈیا رپورٹس کے مطابق اس بٹن کو کلک کرکے دیکھ سکتے ہیں کہ براﺅزر میں کتنے ٹیبز میں میڈیا فائلز موجود ہیں اور وہاں سے ان کو پلے، پوز اور اسکیپ کے بٹنز پر کلک کیا جاسکتا ہے۔
یہ بٹن یو آر ایل ایڈریس بار کے برابر میں 3 لائنیں اور موسیقی کے سائن والا ہوگا جس پر کلک کریں گے تو تمام میڈیا فائلز ڈراپ ڈان باکسز میں نظر آئیں گی،یوٹیوب ویڈیوز کی تو پریویو تصویر بھی نظر آئے گی جس سے ان کو پاز یا پلے کرنا آسان ہوگا۔
اگر صارفین کسی آڈیو یا ویڈیو کو کنٹرول نہیں کرنا چاہتے تو باکس کے اوپری دائیں جانب ایکس بٹن پر کلک کردیں، وہ اس وقت تک کے لیے غائب ہوجائے گی جب تک اس ٹیب کو دوبارہ ری لوڈ نہیں کرتے۔
یہ نیا فیچر اینڈرائیڈ نوٹیفکیشن شیڈ میں پلے کنٹرول سے ملتا جلتا ہے، یہ فیچر پہلے جولائی میں آزمائشی طور پر متعارف کرایا گیا تھا اور ستمبر میں بٹن کا ٹیسٹ شروع ہوا تھا۔
غیر ملکی میڈیا کا کہنا ہے کہ اب اسے کروم ورژن 79 کا باقاعدہ حصہ بنادیا گیا ہے اور ہوسکتا ہے کہ ہر ایک کے پاس دستیاب نہ ہو مگر پھر بھی آپ اسے استعمال کرسکتے ہیں۔
