The news is by your side.

Advertisement

2019 میں گوگل پر پاکستانیوں نے کس کو سب سے زیادہ سرچ کیا؟

کراچی: گوگل نے سال 2019 میں پاکستان سے انٹرنیٹ پر تلاش کیے جانے والے مقبول ترین موضوعات کی فہرست کا اعلان کر دیا ہے۔

تفصیلات کے مطابق رواں سال کے دوران پاکستان میں گوگل پر سب سے زیادہ تلاش کیے جانے والے اور پورے سال گوگل پر ٹرینڈ بنے رہنے والے موضوعات کون سے تھے، کس کو سب سے زیادہ سرچ کیا گیا، اس کی فہرست گوگل نے جاری کر دی ہے۔

فہرست میں سال 2019 میں سب سے زیادہ تلاش کی جانے والی معلومات پر ایک نظر ڈالی گئی ہے اور اس سال ہونے والے اہم ترین واقعات، مقبول ہونے والی خبروں اور دل چسپ ترین تفریحی مواد کا جائزہ بھی پیش کیا گیا ہے، جو پیش خدمت ہے:

سال 2019 کے ٹرینڈنگ موضوعات:

ٹرینڈنگ موضوعات میں پہلے نمبر پر پاکستان بمقابلہ ساؤتھ افریقہ، دوسرے نمبر پر پاکستان بمقابلہ آسٹریلیا، تیسرے نمبر پر لائیو کرکٹ، چوتھے نمبر پر سونی لائیو، پانچویں نمبر پر PSL 4 کا شیڈول، چھٹے نمبر پر کرکٹ ورلڈ کپ، ساتویں نمبر پر پاکستان بمقابلہ نیوزی لینڈ، آٹھویں نمبر پرپی ٹی وی اسپورٹس، نویں نمبر پر پاکستان بمقابلہ انڈیا جب کہ دسویں نمبر پر سری لنک بمقابلہ پاکستان میچ کو سب سے زیادہ سرچ کیا گیا۔

جن شخصیات کے بارے میں معلومات کو 2019 کے دوران سب سے زیادہ تلاش کیا گیا ان میں ٹاپ پر اداکار حمزہ علی عباسی کی اہلیہ اداکارہ نیمل خاور رہیں، جب کہ دوسرے نمبر پر پاکستان فلم انڈسٹری کے چاکلیٹی ہیرو وحید مراد رہے۔ اس کے بعد کرکٹ اسٹار بابر اعظم تیسرے نمبر، چوتھے نمبر پر کرکٹر آصف علی، پانچویں نمبر پر گلوکار عدنان سمیع، چھٹے نمبر پر بھارتی اداکارہ سارہ علی خان، ساتویں نمبر پر کرکٹر محمد عامر، آٹھویں پر پاکستانی ٹی وی آرٹسٹ علیزے شاہ، جب کہ نویں نمبر پر انڈین ونگ کمانڈر ابھی نندن ورتھامان، اور دسویں نمبر پر ٹی وی اینکر مدیحہ نقوی براجمان ہیں۔

جن فلموں اور ٹیلی وژن پروگراموں نے 2019 کے دوران ٹرینڈنگ کی، ان میں ٹاپ پر ایونجرز اینڈ گیم، دوسرے نمبر پر بگ باس 13، تیسرے پر عہدِ وفا، چوتھے پر سنو چندا سیزن 2، پانچویں پر انڈین فلم کبیر سنگھ، چھٹے پر کیپٹن ماروِل، ساتویں پر ڈراما میرے پاس تم ہو، آٹھویں پر کارٹون موٹو پتلو 2019، نویں پر بھروسا پیار تیرا، اور دسویں نمبر پر فلم گلی بوائے رہی۔

پاکستانی عوام جن موضوعات سے متعلق زیادہ تجسس رکھتے ہیں، ان کی تفصیلات حاصل کرنے کے علاوہ، گوگل سرچ ٹولز سے ان موضوعات کی تفصیل بھی حاصل کی جا سکتی ہے، جو 2019 کے دوران دنیا بھر میں سب سے توجہ حاصل کرتے رہے۔

Comments

comments

یہ بھی پڑھیں