سرچ انجن گوگل نے اگلے چند ہفتوں میں کروڑوں صارفین کے زیر استعمال گوگل پلے موویز اور ٹی وی ایپس کو بند کرنے کا فیصلہ کرلیا۔
تفصیلات کے مطابق دنیا بھر میں معروف ٹیکنالوجی کمپنی گوگل اپنے کروڑوں صارفین کے زیر استعمال ایک اور ایپلی کیشن سروس اگلے چند ہفتوں میں بند کرنے جارہی ہے۔
غیرملکی خبر رساں ادارے کی رپورٹ کے مطابق گوگل کی بند کی جانے والے ایپس میں گوگل پلے موویز اور ٹی وی ایپ شامل ہیں۔ یہ سروس پہلے ہی اسمارٹ ٹی وی سے ہٹا دی گئی ہے اور جلد ہی اسے فون سروس سے بھی ہٹا دیا جائے گا۔
اس کے بعد 17 جنوری سے گوگل صارفین ایپ کے ذریعےخریدی گئی یا کرائے پر لی جانے والی فلموں تک رسائی حاصل نہیں کرسکیں گے۔ تاہم خریدی گئی فلمیں اور ٹی وی شوز کو مکمل طور پر حذف کرنے کے بجائے اینڈرائیڈ ٹی وی اور یو ٹیوب پر منتقل کر دیا جائے گا۔
اپنے ایک بیان میں گوگل انتظامیہ نے وضاحت کی ہے کہ وہ جنوری 2024 میں گوگل پلے موویز اور ٹی وی کے آخری حصوں کو بھی ختم کردے گا، جس کے بعد گوگل پلے موویز اور ٹی وی مزید اینڈرائیڈ ٹی وی ڈیوائسز یا گوگل پلے ویب سائٹ پر دستیاب نہیں ہوں گے۔
یہ سروس 2021 کے بعد سے گوگل کی طرف سے مرحلہ وار ختم کی جا رہی ہے۔ ایپ کو پہلے ہی Roku ڈیوائسز اور زیادہ تر اسمارٹ ٹی وی سے ہٹا دیا گیا ہے، لیکن یہ اب بھی اینڈرائیڈ ٹی وی اور گوگل پلے اسٹور پر دستیاب ہے۔
اینڈرائیڈ ٹی وی ہیلپ پر ایک حالیہ پوسٹ میں گوگل نے تصدیق کی ہے کہ سروس جلد ہی ان پلیٹ فارمز سے ہٹا دی جائے گی۔
پوسٹ میں گوگل نے وضاحت کی کہ کمپنی نئی فلموں یا ٹی وی شوز کو خریدنے یا ان تک رسائی کے عمل کو آسان بنانے کے لیے کچھ تبدیلیاں کر رہی ہے۔
