کیلی فورنیا: گوگل نے موبائل صارفین کو انٹرنیٹ کے بغیر چلنے والی ٹرانسلیشن (ترجمہ کرنے والی) ایپ کی سہولت متعارف کرادی۔
تفصیلات کے مطابق گوگل کی جانب سے اینڈرائیڈ اور آئی او ایس صارفین کے لیے ایسی ٹرانلیشن ایپ متعارف کرائی گئی جو انٹرنیٹ کے بغیر بھی آسانی کے ساتھ چلائی جاسکتی ہے۔
قبل ازیں صارفین کو گوگل ٹرانسلیٹ استعمال کرنے کے لیے انٹرنیٹ کی لازم سہولت درکار ہوتی تھی اسی باعث بہت سارے لوگ اسے استعمال کرنے سے کتراتے تھے اور وہ انٹرنیٹ کنکشن نہ ہونے کے باعث بے بس ہوتے تھے۔
ترجمان گوگل کے مطابق مذکورہ ایپ کی سروس محدود صارفین کو 13 جون سے فراہم کردی گئی جبکہ آئندہ چند دنوں میں اسے دنیا بھر میں رہنے والے تمام لوگ استعمال کرسکیں گے۔
مزید پڑھیں: گوگل کا نیا چیٹ میسنجر، دیگر موبائل ایپ کے لیے خطرہ
ایپ میں اردو سمیت 59 زبانوں کو شامل کیا گیا ہے جن کا ترجمہ بغیر انٹرنیٹ آسانی کے ساتھ کیا جاسکے گا۔
گوگل کے مطابق عام اسمارٹ فون سے بھی اس آن لائن ترجمہ کرنے والی ایپ کو استعمال کیا جاسکے گا کیونکہ مجموعی طور پر اس کا سائز 30 سے 40 ایم بی ہے۔ کمپنی کے مطابق امریکا اور برطانیہ میں رہنے والے صارفین گوگل اور آئی فون اسٹور سے ایپ اپنے فون میں انسٹال کر کے استعمال کرسکتے ہیں۔
واضح ہے کہ انٹرنیٹ پر مختلف اداروں اور ویب سائٹس کی جانب سے صارفین کو آن لائن ترجمہ کرنے کی سہولت فراہم کی جاتی ہے تاہم اکثر لوگ ٹرانسلیشن کے لیے گوگل کو ہی ترجیح دیتے ہیں۔
اسے بھی پڑھیں: معذوروں کے لیے گوگل کا بڑا اقدام
قبل ازیں مائیکروسافٹ نے آئی او ایس صارفین کو آف لائن ترجمے کی سہولت فراہم کی تھی جس کو مدنظر رکھتے ہوئے گوگل نے تمام ہی اسمارٹ ڈیوائسز کے لیے خصوصی ایپ تیار کی۔
