کراچی: گوگل کی جانب سے پاکستانی خواتین کے لیے بڑا قدم اٹھایا گیا، خواتین کے عالمی دن کے موقع پر سیکڑوں خواتین کو ٹیکنالوجی سے متعلق تربیت فراہم کی گئی۔
تفصیلات کے مطابق گوگل کی ویمن ٹیک میکرز ایونٹس کے تحت اس سال 800 سے زائد پاکستانی خواتین ڈویلپرز کو تربیت فراہم کی گئی، ویمن ٹیک میکرز سیشنز میں آن لائن سیفٹی، کوڈنگ اور پریزینٹیشن اسکلز جیسے موضوعات شامل تھے۔
گوگل کا کہنا تھا کہ وہ پاکستانی خواتین کی ٹیکنالوجی کے میدان میں اپنا کیرئیر بنانے کی حوصلہ افزائی کرتا ہے۔
ویمن ٹیک میکرز ایمبیسیڈرز نے اس سال خواتین ڈیویلپرز کی کمیونٹی کے لیے بامقصد اور مددگار پروگرام منعقد کر کے زبردست کام کیا۔ توقع ہے کہ ٹیکنالوجی کے میدان میں مزید خواتین سامنے آئیں جو دیگر خواتین کے لیے رول ماڈل بن سکیں۔
واضح رہے کہ گوگل 2013 سے عالمی یوم خواتین کی مناسبت سے 75 سے زائد ممالک میں ویمن ٹیک میکرز کے ہزاروں ایونٹس منعقد کرچکا ہے۔
