اسلام آباد: حکومت اور تحریک انصاف کے درمیان ہونے والے مذاکرات سے متعلق اہم خبر سامنے آئی ہے۔
تفصیلات کے مطابق چیئرمین سینیٹ صادق سنجرانی کے مطابق دونوں کمیٹیوں کی باہمی رضامندی کے بعد مذاکرات کا وقت تبدیل کردیا گیا ہے۔
چیئرمین سینیٹ کے مطابق مذاکرات کل صبح گیارہ بجے کے بجائے رات نو بجے سینیٹ سیکرٹریٹ میں ہونگے۔
چیئرمین سینیٹ صادق سنجرانی کے مطابق مذاکراتی کمیٹیوں کے ارکان کی مصروفیات کے باعث وقت تبدیل کیا گیا ہے۔
واضح رہے کہ اب تک حکومت اور پاکستان تحریک انصاف کی مذاکراتی کمیٹی کے درمیان دو بیٹھک ہوچکی ہیں۔
دونوں جانب سے اب تک مذاکرات درست سمت میں جانے کے دعوے کئے گئے ہیں۔
کل ہونے والے مذاکرات میں پی ٹی آئی اور حکومت دونوں ایک دوسرے کو اپنے مطالبات تحریری طور پر پیش کرینگے۔
گذشتہ روز عمران خان کی زیر صدارت زمان پارک میں اہم ترین اجلاس ہوا تھا، اس اجلاس میں پی ٹی آئی مذاکراتی ٹیم کے ارکان شاہ محمود قریشی، فواد چوہدری اور بیرسٹر علی ظفر نے خصوصی شرکت کی تھی۔
اہم ترین اجلاس میں شرکا نے اتفاق رائے سے حکومت کے ساتھ مذاکرات جاری رکھنے کا فیصلہ کیا تھا تاہم شرکا نے اس بات پر بھی زور دیا کہ مذاکرات کو زیادہ طول نہ دیا جائے۔
