اسلام آباد: وزیر اعظم عمران خان نے لنگر خانہ پروگرام کو ملک بھر کے پس ماندہ علاقوں تک وسعت دینے کا فیصلہ کر لیا ہے، اسلام آباد کے بعد اب سندھ کے ضلع تھرپارکر میں بھی لنگر خانہ کھولا جائے گا۔
تفصیلات کے مطابق حکومت نے تھرپارکر میں غریبوں کے لیے 3 لنگر خانے کھولنے کا فیصلہ کیا ہے جن میں 600 افراد کو مفت کھانا ملے گا، وزیر اعظم عمران خان تھرپارکر میں لنگر خانے کا جلد افتتاح کریں گے۔
تھرپارکر میں وزیر اعظم مستحق اور نادار لوگوں کے ساتھ بیٹھ کر کھانا بھی کھائیں گے، یہ لنگر خانے پبلک پرائیویٹ پارٹنر شپ کے تحت شروع کیے جائیں گے۔
لنگر خانوں میں کھانا حفظان صحت کے اصولوں کے مطابق اور معیاری ہوگا، تھرپارکر لنگر خانوں میں 2 وقت کا کھانا مفت فراہم کیا جائے گا، وزیر اعظم نے تھر میں لنگر خانے کھولنے سے متعلقہ وزارت کو احکامات جاری کر دیے ہیں۔
یہ بھی پڑھیں: وزیراعظم عمران خان نے اسلام آباد میں“احساس لنگر” اسکیم کا افتتاح کردیا
لنگر خانوں کی جگہ کے تعین کے لیے وزیر اعظم کی ٹیم آیندہ ہفتے تھرپارکر کا دورہ کرے گی۔
یاد رہے کہ وزیر اعظم عمران خان نے 7 اکتوبر کو اسلام آباد میں احساس سیلانی لنگر اسکیم کا افتتاح کیا تھا، لنگر اسکیم سماجی و فلاحی بہبود کے جامع پروگرام احساس کا اہم جزو ہے۔
وزیر اعظم عمران خان نے کہا تھا کہ لنگر پروگرام کے آغاز سے انھیں بہت خوشی ہے، جب تک لوگوں کو روزگار نہیں ملتا لنگر پروگرام کو بڑھاتے رہیں گے، کم زور طبقے کی مدد کی جائے گی تو ریاست میں برکت آئے گی۔
