اسلام آباد: حکومت نے خالد جاوید خان کو اٹارنی جنرل مقرر کرنے کا فیصلہ کر لیا ہے۔
تفصیلات کے مطابق وزیر اعظم نے خالد جاوید خان کو نیا اٹارنی جنرل پاکستان مقرر کرنے کا فیصلہ کر لیا ہے، اس سلسلے میں وزیر اعظم نے وزارت قانون کو تعیناتی کی ہدایت بھی جاری کر دی ہے۔
وزیر اعظم عمران خان نے وزارت قانون کو ہدایت کی ہے کہ خالد جاوید خان کی اٹارنی جنرل آف پاکستان کی حیثیت سے تقرری کی سمری آج ہی وزیر اعظم آفس بھجوائے۔
قبل ازیں، معاون خصوصی برائے اطلاعات فردوس عاشق اعوان نے سماجی رابطے کی ویب سائٹ ٹویٹر پر اپنے پیغام میں کہا تھا کہ حکومت نے خالد جاوید خان کو نیا اٹارنی جنرل مقرر کرنے کا فیصلہ کیا ہے، انھوں نے لکھا کہ حکومت تمام آئینی اداروں کا احترام کرتی ہے، آئینی اداروں کی عزت و توقیرہمارے لیے انتہائی مقدم ہے، آئین کی سربلندی اور قانون کی حکمرانی حکومت کی اولین ترجیح ہے۔
حکومت نے خالد جاوید خان کو نیا اٹارنی جنرل مقرر کرنے کا فیصلہ کیا ہے۔آئین کی سربلندی اور قانون کی حکمرانی وزیراعظم عمران خان کی اولین ترجیح ہے۔تمام آئینی اداروں کا احترام کرتے ہیں،ان کی عزت و توقیر ہمارے لئے انتہائی مقدم ہے۔
— Dr. Firdous Ashiq Awan (@Dr_FirdousPTI) February 20, 2020
خیال رہے کہ گزشتہ روز اٹارنی جنرل آف پاکستان انور منصور خان نے اپن منصب سے استعفیٰ دے دیا تھا، صدر مملکت کو ارسال کیے گئے استعفے میں انھوں نے کہا تھا کہ میں پاکستان بار کونسل کے مطالبے پر خود کو عہدے سے الگ کر رہا ہوں، گزشتہ ڈیڑھ سال تمام صلاحیتوں کو بروئے کار لا کر ذمہ داریوں کو نبھایا۔
اٹارنی جنرل آف پاکستان انور منصور نے استعفیٰ دے دیا
یاد رہے کہ دو دن قبل جسٹس قاضی فائز عیسیٰ کے خلاف صدارتی ریفرنس کی سماعت کے دوران سپریم کورٹ کے فل بینچ نے اٹارنی جنرل کو سپریم کورٹ کے ججز پر لگائے گئے الزام کا تحریری ثبوت دینے یا معافی مانگنے کا حکم دیا تھا۔
جسٹس قاضی فائزعیسیٰ کیس سے متعلق سپریم کورٹ میں حکومت کی جانب سے بھی جواب جمع کرایا گیا، وفاقی وزیر قانون فروغ نسیم اور شہزاد اکبر نے کیس میں اٹارنی جنرل کے بیان سے اظہار لاتعلقی کیا، جواب میں کہا گیا کہ انور منصور خان نے جو زبانی بیان دیا وہ حکومت کی مرضی کے خلاف تھا، وفاقی حکومت اعلیٰ عدلیہ کے ججوں کی عزت اور احترام کرتی ہے۔
