The news is by your side.

Advertisement

حکومت نے یوٹیلٹی اسٹور کو 50 بلین کا پیکیج دیا ہے، حفیظ شیخ

اسلام آباد: مشیر خزانہ حفیظ شیخ کا کہنا ہے کہ حکومت امپورٹ سے بھی کم قیمت پر گندم دے رہی ہے، حکومت نے یوٹیلٹی اسٹور کو 50 بلین کا پیکیج دیا ہے۔

اے آر وائی نیوز کی رپورٹ کے مطابق مشیر خزانہ حفیظ شیخ نے میڈیا سے گفتگو کرتے ہوئے کہا کہ حکومت نے یوٹیلٹی اسٹور کو 50 بلین کا پیکیج دیا ہے، سہولت بازاروں میں آٹا کم قیمت پر دیا جارہا ہے، سستا آٹا یوٹیلٹی اسٹورز اور سہولت بازاروں میں دستیاب ہے۔

انہوں نے کہا کہ 40 ہزار ٹن گندم چاروں صوبوں کی جانب سے ریلیز ہورہی ہے، گزشتہ سال 20 سے 22 لاکھ ٹن گندم کم پیدا ہوئی، حکومت نے فوری اقدامات کرکے تین لاکھ ٹن گندم امپورٹ کی، حکومت قیمتیں کنٹرول کرنے کے لیے کوششیں کررہی ہے۔

مشیر خزانہ نے کہا کہ ہماری کمپنیوں کے منافع میں اضافہ ہورہا ہے، 100 بڑی کمپنیوں کے منافع میں تقریباً 56 فیصد منافع ہوا ہے۔

حفیظ شیخ نے کہا کہ احساس پروگرام کا دائرہ کار بڑھا دیا گیا ہے، اب 45 لاکھ کے بجائے 70 لاکھ لوگوں کو کیش دیا جائے گا۔

انہوں نے کہا کہ حکومت کا اہم ترین گول ہے روزگار کے مواقع پیدا کیے جائیں، سب سے پہلے ہم نے کنسٹرکشن کو پروان چڑھایا، قرضے بھی سستے داموں دئیے جارہے ہیں، ان سب کا مقصد ہے کہ روزگار کے مواقع بڑھیں۔

Comments

یہ بھی پڑھیں