اسلام آباد: حکومت پاکستان کو دنیا بھر میں تیزی سے پھیلنے والی ایم پاکس ویکسین کی خریداری میں کامیابی نہیں مل سکی ہے۔
ذرائع کے مطابق حکومت پہلے فیز میں ایک ہزار ایم پاکس ویکسین ڈوز خرید رہی ہے، وزارت صحت نے ایم پاکس ویکسین کیلئے ڈبلیو ایچ او سے رابطہ کیاہے، ڈبلیو ایچ او ایم پاکس ویکسین کی خریداری کیلئے رابطے کر رہا ہے۔
ذرائع وزارت قومی صحت کا کہنا ہے کہ عالمی سطح پر ایم پاکس ویکسین کی ایک ڈوز قیمت 200 ڈالر سے زائد ہے اور اس کی قلت عالمی سطح پر بھی ہے۔
ذرائع وزارت صحت کا کہنا ہے کہ پہلے فیز میں ایک ہزار فرنٹ لائن ہیلتھ ورکرز کی ویکسی نیشن ہوگی، ایئرپورٹ، بندرگاہ، بارڈرز پر تعینات وزارت صحت عملے کی ویکسی نیشن ہوگی اس کے ساتھ ہی ایم پاکس مریضوں کا علاج کرنے والے عملے کی ویکسی نیشن ہوگی۔
ذرائع کا مزید کہنا تھا کہ ایم پاکس سے بچاؤ کیلئے ہر فرد کو 2 ڈوز لگائی جائیں گی، ایم پاکس ویکسین کی دوسری ڈوز 2 ماہ کے وقفے سے لگائی جائے گی۔
عالمی ادارہ صحت نے ایم پاکس کو پبلک ہیلتھ ایمرجنسی آف انٹرنیشنل کنسرن (پی ایچ ای آئی سی) قرار دیا۔ صحت عامہ کے ایک اور مسئلے کے علاوہ ایم پاکس پورے پاکستان بالخصوص بچوں کے لیے نیا بحران پیدا کرسکتا ہے۔
یہ وائرس جانوروں میں پایا جاتا ہے اور متاثرہ شخص سے قریبی تعلق کی وجہ سے پھیلتا ہے، اپنی جغرافیائی حدود کو توڑتا ہوا براعظم افریقہ میں بڑے پیمانے میں پھیلنے کے بعد اب یورپ، شمالی امریکا اور دیگر براعظم میں پہنچ چکا ہے۔
