پشاور : صوبہ خیبر پختونخوا کے گورنر کی جانب سے الیکشن کمیشن کو صوبائی اسمبلی کیلئے انتخابات کی تاریخ کے حوالے سے لکھا گیا خط موصول ہوگیا۔
تفصیلات کے مطابق گورنرکے پی حاجی غلام علی نے الیکشن کمیشن کو صوبے میں انتخابات سے متعلق خط کا جواب ارسال کردیا ہے، گورنر کے پی نے صوبے میں انتخابات کیلئے الیکشن کمیشن کو تاریخ دے دی۔
ذرائع کے مطابق گورنر خیبرپختونخوا نے صوبے میں انتخابات کے لئے الیکشن کمیشن کو 16، 17 اور 18 اپریل کی تاریخ دی ہے اور ساتھ ہی شفاف انتخابات کا انعقاد یقینی بنانے کی بھی ہدایت بھی دی۔
الیکشن کمیشن کو گورنر کے پی کا انتخابات کے حوالے سے خط موصول#ARYNews pic.twitter.com/317xTBW5c1
— ARY NEWS (@ARYNEWSOFFICIAL) January 31, 2023
اس حوالے سے مصدقہ ذرائع کا کہنا ہے کہ الیکشن کمیشن کو گورنر کے پی حاجی غلام علی کا انتخابات کے حوالے سے خط موصول ہوگیا ہے۔ ذرائع الیکشن کمیشن کے مطابق گورنر کے پی نے16اپریل کی تاریخ الیکشن کمیشن کو بھجوادی ہے۔
ذرائع کا یہ بھی کہنا ہے کہ الیکشن کمیشن نے اس حوالے سے نگراں وزیراعلیٰ خیبر پختونخوا کو بلانے کا فیصلہ کیا ہے، نگراں وزیراعلیٰ کوخط لکھ کر الیکشن کمیشن بلایا جائے گا، ان سے صوبے میں ہونے والے انتخابات سے متعلق تفصیلی بات کی جائے گی۔
واضح رہے کہ الیکشن کمیشن نے گورنر سے صوبے میں الیکشن کے لئے تاریخ مانگی تھی تاہم غلام علی نے انہیں خط کا جواب نہیں دیا تھا، بعد ازاں گورنر کی جانب سے خط کا جواب نہ دینے پر پی ٹی آئی نے خیبرپختونخوا میں 90 دن کے اندرانتخابات کرانے کے لیے پشاور ہائیکورٹ سے رجوع کرلیا تھا۔
