لاہور: گورنر پنجاب چوہدری محمد سرور نے کہا ہے کہ ہم نے دہشت گردی کو شکست دی ہے، امریکا افغانستان میں امن چاہتا ہے تو اسے ہماری بات سننا چاہئے۔
تفصیلات کے مطابق گورنر پنجاب چوہدری محمد سرور نے میڈیا سے گفتگو کرتے ہوئے کہا کہ دہشت گردی کے خلاف ہماری فوج اور قوم کی گراں قدر خدمات ہیں۔
گورنر پنجاب نے کہا کہ سی پیک میں شامل پنجاب کے منصوبے نہایت اہم ہیں، سی پیک کے منصوبے پنجاب سے کہیں زیادہ ہیں، جس میں گوادر پورٹ نہایت اہم ہے۔
چوہدری محمد سرور نے کہا کہ چین کشمیر میں 5 اگست کے بعد کی صورت حال پر حمایت پر شکر گزار ہیں۔
مزید پڑھیں: مسئلہ کشمیر کے حل ہونے تک جنوبی ایشیا میں امن ممکن نہیں: گورنر پنجاب
واضح رہے کہ چند روز قبل ان کا کہنا تھا کہ پاکستان بھارت سمیت تمام ہمسایوں کے ساتھ امن چاہتا ہے، تاریخ گواہ ہے کہ جنگ کبھی مسئلے کا حل نہیں ہوتی۔
گورنر پنجاب کا کہنا تھا کہ جب تک مسئلہ کشمیر حل نہیں ہوتا جنوبی ایشیا میں امن ممکن نہیں، مودی کے ہوتے ہوئے امن کی توقع نہیں ہے۔ فاشسٹ آدمی کبھی امن کی بات نہیں کرتا۔
ان کا کہنا تھا کہ بھارت کی ایل او سی پر بلا اشتعال فائرنگ دہشت گردانہ ذہن کی عکاس ہے، مختلف ہتھکنڈوں سے بھارت خطے کے امن کو داؤ پر لگانا چاہتا ہے۔
گورنر پنجاب کا کہنا تھا کہ بھارت جان لے کسی بھی در اندازی کا بھرپور جواب دیا جائے گا۔ پاکستانی عوام اور افواج ملک کے تقدس کی حفاظت کرنا جانتے ہیں۔
