لاہور: گورنر پنجاب چوہدری محمد سرور کا کہنا ہے کہ بھارت کا زوال شروع ہو چکا ہے، مسلمانوں کے خلاف مودی سرکار کا بغض کھل کر سامنے آگیا۔
تفصیلات کے مطابق گورنر پنجاب چوہدری محمد سرور کا کہنا ہے کہ بھارت کا زوال شروع ہو چکا، شہریت متنازعہ بل کے خلاف احتجاج پورے بھارت میں پھیل گیا۔
گورنر پنجاب کا کہنا تھا کہ بھارتی عوام نے کالے قانون کو یکسر مسترد کردیا ہے، نام نہاد سیکولر بھارت کا سیاہ چہرہ دنیا کے سامنے عیاں ہوچکا۔ قائد اعظم محمد علی جناح کے 2 قومی نظریے کو تقویت ملی۔
انہوں نے کہا کہ مسلمانوں کے خلاف مودی سرکار کا بغض کھل کر سامنے آگیا، بھارتی حکومت متنازعہ قانون سے اپنی عوام کی توجہ ہٹانا چاہتی ہے۔
گورنر پنجاب نے مزید کہا کہ مودی سرکار لائن آف کنٹرول پر بلا اشتعال فائرنگ کر کے توجہ ہٹانا چاہتی ہے۔
اس سے قبل ایک موقع پر گورنر پنجاب کا کہنا تھا کہ بھارت میں دہری شہریت کے قانون سے مسلمان براہ راست متاثر ہیں، بھارت کی مقبوضہ کشمیر میں دراندازی اور مظالم پر اقوام متحدہ سمیت عالمی اداروں کی خاموشی شرمناک ہے۔
انہوں نے کہا تھا کہ مکار دشمن بھارت کے خلاف ہمیں باہمی اتحاد کی ضرورت ہے۔ بھارت میں اقلیتوں کے انسانی حقوق کا قتل عام کیا جارہا ہے مگر پاکستانی حکومت قائد اعظم کے افکار کے مطابق اقلیتوں کو ان کے حقوق فراہم کر رہی ہے۔
