وزیرآباد: گورنرپنجاب سردار سلیم حیدر خان نے کہا ہے کہ پی ٹی آئی پر پابندی کا فیصلہ ن لیگ کا اپنا فیصلہ ہے، پیپلز پارٹی سے مشورہ نہیں کیا گیا۔

گورنرپنجاب سردار سلیم حیدر خان نے وزیر آباد میں میڈیا سے گفتگو کرتے ہوئے کہا کہ پیپلز پارٹی اس معاملے کو پارٹی اجلاس اور سی ای سی میں لے کر جائے گی۔

انہوں نے کہا کہ میری ذاتی رائے میں پی ٹی آئی کو دو حصوں میں رکھ کر سوچیں، جو 9 مئی واقعات میں ملوث ہیں انہیں سزائیں دیں لیکن جو محب وطن ہیں ان کےخلاف کارروائی مناسب نہیں ہے۔

واضح رہے کہ گزشتہ دنوں وفاقی حکومت نے پی ٹی آئی پر پابندی اور پی ٹی آئی کے بانی چیئرمین اور سابق وزیر اعظم عمران خان کے خلاف آرٹیکل 6 کے تحت مقدمہ چلانے کا فیصلہ کیا تھا۔

اس کے علاوہ حکومت نے مخصوص نشستوں کے کیس میں سپریم کورٹ کے فیصلے کے خلاف نظرثانی اپیل دائر کرنے کا بھی اعلان کیا تھا۔