کراچی : گورنر سندھ محمد زبیر کو سابق آرمی چیف جنرل راحیل شریف پر طنز مہنگا پڑگیا، غیر تو غیر اپنوں نے بھی گورنر سندھ کو لتاڑ دیا۔
تفصیلات کے مطابق گورنر سندھ محمد زبیر نے گزشتہ روز اپنے ایک بیان میں ملک میں امن وامان کا کریڈٹ جنرل (ر) راحیل شریف کے بجائے صرف وزیر اعظم نواز شریف کو دیا اور ساتھ ہی سابق آرمی چیف پر طنز بھی کرڈالا۔
جس نے نیا پنڈورا بکس کھول دیا ہے، حکومت کی مخالف جماعتوں نے تو گورنر سندھ کے اس بیان کو آڑے ہاتھوں لیا، قومی اسمبلی میں اپوزیشن لیڈر سید خورشید شاہ کے ساتھ ساتھ حکمران جماعت کے دیگر ارکان بھی اس بیان کو مسترد کرتے ہوئے نظر آئے۔
وفاقی وزیر ریلوے خواجہ سعد رفیق نے گورنر سندھ محمد زبیر کا بیان مسترد کرتے ہوئے سابق آرمی چیف جنرل راحیل شریف کی صلاحیتوں کی تعریف کی، جبکہ مشیر سلامتی کونسل ناصر جنجوعہ نے کہا کہ وہ اس سوچ سے علیحدہ سوچ رکھتے ہیں۔
اس کے علاوہ پی ٹی آئی کے چیئرمین عمران خان گورنر سندھ کے بیان کو پہلے ہی احمقانہ قرار دے چکے ہیں، پیپلزپارٹی، جماعت اسلامی اور دیگر جماعتوں کی جانب سے بھی گورنر سندھ کے بیان پر سخت ردعمل سامنے آیا ہے۔
