لاہور: گورنر سندھ کامران ٹیسوری کراچی کی نہاری کے بعد لاہور کے سری پائے کھانے کے بھی شوقین نکلے، سری پائے کھانے وہ مزنگ چورنگی پہنچ گئے۔
تفصیلات کے مطابق گورنر سندھ کامران ٹیسوری نے لاہور میں بھی عوامی انداز اپنایا، جس طرح وہ کراچی میں نہاری کھانے کے لیے فیڈرل بی ایریا گئے تھے، ویسے ہی لاہور میں وہ مشہور سری پائے کھانے مزنگ چورنگی پہنچے۔
گورنر سندھ نے لاہوری عوام کے ساتھ سری پائے کا مزہ لیا، اس موقع پر شہریوں نے کامران ٹیسوری کے ساتھ سیلفیاں بھی لیں۔
واضح رہے کہ گورنر سندھ کامران ٹیسوری لاہور کے دورے پر ہیں، انھیں گورنر پنجاب محمد بلیغ الرحمان نے دعوت دی تھی، گزشتہ روز انھوں نے گورنر پنجاب سے ملاقات بھی کی تھی۔
کراچی میں گورنر سندھ نے کوٹ اتار کر اور آستینیں چڑھا کر مغز نلی نہاری کھائی تھی، اس موقع پر انھوں نے کہا تھا ’’میری صحت دیکھ لیں میں کھانے پینے کا شوقین ہوں، لیکن میں کسی کو ’کھانے پینے‘ نہیں دوں گا۔‘‘
گورنر سندھ کامران ٹیسوری نے ’مولا جٹ‘ دیکھنے کے بعد کیا کہا؟
کامران ٹیسوری نے دل چسپ بات بتائی کہ انھیں گورنر شپ کے 70 دنوں میں رات کا کھانا دو مرتبہ کھانا پڑا، ایک دفعہ اہلیہ کے ساتھ دوسری مرتبہ لوگوں کے ساتھ۔
انھوں نے کہا ’’میں نے اہلیہ کو کبھی نہیں بتایا کہ میں کھا چکا ہوں، آج بھی تھوڑا بہت اہلیہ کا دل رکھنے کے لیے ان کے ساتھ کھاؤں گا۔‘‘
