کراچی: گورنرسندھ محمد زبیرنے کہا کہ میرے دروازے تمام سیاسی قوتوں کے لئے کھلے ہیں، سیاست کے یکساں مواقعوں کی فراہمی کو یقینی بنایا جائے گا.
تفصیلات کے مطابق گورنر سندھ سے حافظ نعیم الرحمان کی سربراہی میں وفد کی ملاقات ہوئی،سیاسی صورتحال،ترقیاتی منصوبوں اورباہمی دلچسپی کے امور پر تبادلہ خیال کیا گیا.
اس موقع پر گورنر سندھ محمد زبیرنے کہا کہ میرے دروازے تمام سیاسی قوتوں کے لئے کھلے ہیں، سیاست کے یکساں مواقعوں کی فراہمی یقینی بنائی جائے گی، صوبے کی ترقی کے لئےتمام سیاسی جماعتوں سے رابطہ کروں گا.
مردم شماری کے حوالے سے ان کا کہنا تھا کہ اس سلسلے کی شفافیت کے لئے فوج کی مدد لی جارہی ہے،انتخابی اصلاحات کے ذریعے منصفانہ انتخابات کا انعقاد یقینی بنایا جائے گا.
یہاں پڑھیں:کراچی آپریشن سے پورے صوبے میں امن قائم ہوا، محمد زبیر
گورنر سندھ نے کہا کہ تمام افراد کو مل کر سندھ کی ترقی کے لئے کام کرنا ہوگا، محمد زبیر نے کہا کہ کراچی پاکستان کا معاشی حب ہے شہر کی ترقی میں ہی ملک کا روشن مستقبل پوشیدہ ہے.
یاد رہے، گورنرمحمد زبیر نے رواں ماہ صوبے کے 32 ویں گورنرکی حیثیت سےعہدے کا حلف اٹھایا ہے ، انہوں نے 2012 میں مسلم لیگ ن میں شمولیت اختیارکی اورپارٹی کے منشور کی تیاری میں معیشت اور ٹیکس ریفارمز کے شعبوں میں معاونت کی۔
مسلم لیگ ن کے اقتدار میں آنے کےبعد محمد زبیرکو پہلے بورڈ آف انوسٹمنٹ کا چیئرمین اور دسمبر 2013میں نجکاری کمیشن کا سربراہ بنایا گیا، جبکہ اب وہ گورنر سندھ کے فرائض سر انجام دے رہے ہیں.
