کراچی: گورنر سندھ عمران اسماعیل کا کہنا ہے کہ شہر قائد کا امن شہید جوانوں کی قربانیوں کا ثمر ہے، بےروزگاری کے خاتمے کے لیے اقدامات کیے جارہے ہیں۔
ان خیالات کا اظہار انہوں نے نیشنل ڈیفنس یونیورسٹی وفد سے ملاقات میں کیا، اس موقع پر گورنر سندھ عمران اسماعیل کو شہر میں جاری ترقیاتی منصوبوں اور امن و امان کی صورت حال سے متعلق آگاہ کیا گیا۔
فراہمی آب کی بہتری کے لیے ڈی سینی ٹیشن پلانٹس کی تنصیب سے بھی آگاہ کیا گیا۔
اس موقع پر گورنر سندھ کا کہنا تھا کہ گرین لائن منصوبے سمیت وفاقی منصوبوں کو سپورٹ کررہے ہیں، صنعتی روابط میں بہتری کے لیے صنعتی کمیٹی کا قیام عمل میں لایا گیا۔
شیخ رشید کا گوادر میں ریلوے اسٹیشن تعمیر کرنے کا اعلان
ان کا مزید کہنا تھا کہ بے روزگاری کا خاتمہ حکومت کی ترجیحات میں شامل ہیں، اس کے لیے اقدامات کر رہے ہیں۔
خیال رہے کہ گذشتہ روز گورنر سندھ عمران اسماعیل، وفاقی وزیر ریلوے شیخ رشید اور وفاقی وزیر برائے آبی وسائل فیصل واوڈا نے کوئٹہ ریلوے اسٹیشن کا دورہ کیا تھا۔
اس موقع پر میڈیا سے گفتگو کرتے ہوئے گورنر سندھ عمران اسماعیل نے کہا تھا کہ شیخ رشید کے پاس کسی کی پرچی نہیں چلتی، ریلوے میں 10 ہزار بھرتیاں میرٹ پر کی جائیں گی۔
واضح رہے کہ وزیر ریلوے نے گوادر میں ریلوے اسٹیشن تعمیر کرنے کا اعلان کردیا ہے۔
