کراچی : گورنر سندھ محمد زبیرنے کہا ہے کہ سابق ٹیسٹ کرکٹر یونس خان کی کامیابیاں نوجوان کھلاڑیوں کیلئے مشعل راہ ہے، یونس خان نے ہر ٹیم کیخلاف اپنی صلاحیتوں کا لوہا منوایا۔
ان خیالات کا اظہار انہوں نے گورنر ہاؤس کراچی میں لیجنڈری کرکٹر یونس خان کے اعزاز میں افطار ڈنر کی تقریب کے موقع پر صحافیوں سے گفتگو کرتے ہوئے کیا۔
افطار ڈنرمیں کرکٹ کے سابق کپتان اور کھلاڑیوں سمیت مختلف طبقہ فکر سے تعلق رکھنے والی شخصیات نے شرکت کی۔ گورنر سندھ محمد زبیر نے تقریب سے خطاب کرتے ہوئے کہا کہ یونس خان ایک ایسے کھلاڑی ہیں جنھوں نے ہر ٹیم کیخلاف اپنی صلاحیتوں کا لوہا منوایا۔
ان کا کہنا تھا کہ قابل ستائش بات یہ ہے کہ پورے کرکٹ کیرئیر میں یونس خان کا نام کسی بھی تنازعے سے جڑا دکھائی نہیں دیتا ہے۔
اس موقع پر خطاب کرتے ہوئے یونس خان نے کہا کہ انیس سو بانوے کا ورلڈ کپ، ورلڈ ٹی ٹوئنٹی، ٹیسٹ کی نمبر ون ٹیم اور چیمپیئنز ٹرافی جیتنا کھلاڑیوں سے زیادہ ملک و قوم کی کامیابی ہے۔ تقریب کے اختتام پر گورنر سندھ نے یونس خان کو یادگار شیلڈ کےساتھ یاداشت نامہ پیش کیا۔
