کراچی گورنر سنده محمد زبیر عمر نے کہا ہے کہ وزیر اعظم شاہد خاقان عباسی نے برآمد کنندگان کے ریفنڈ فوری جاری کرنے کے احکامات دیے ہیں، ملک میں سرمایہ کاری اس وقت بڑهے گی جب تاجروں کا ریفنڈ کا معاملہ حل ہوگا۔
یہ بات انہوں نے کراچی گورنر ہاؤس میں اقتصادی رپورٹنگ کرنے والے (کامرس رپورٹرز) صحافیوں کے ایک وفد سے بات چیت کرتے ہوئے کہی۔
حکومتی ریونیو 3500 ارب ہوگیا، ریفنڈ روکنے کی کوئی وجہ نہیں
محمد زبیر کا کہنا تها کہ حکومت کا ریونیو 4 سال میں 1900 سے بڑھ کر 3500 ارب ہوگیا ایسے میں تاجروں کے ریفنڈ روکنے کی کوئی وجہ نہیں ہے۔
گورنر سندھ نے کہا کہ پاک چین اقتصادی راہداری منصوبہ مسلم لیگ نون کا کارنامہ ہے جس سے ملک میں توانائی اور انفرا اسٹرکچر کے منصوبے زیر تکمیل ہیں اور ملک معاشی طور پر مستحکم ہو رہا ہے۔
ان کا کہنا تھا کہ ملک میں سرمایہ کاری کا ماحول بہتر بنانے کے لیے امن وامان اور بجلی کا بحران کا حل نون لیگ حکومت کی ترجیحات تهیں اور اس پر خاطر خواہ کامیابی ملی ہے، ملک میں صنعتی لوڈ شیڈنگ ختم ہو گئی ہے۔
ملک میں ٹیکنو کریٹ حکومت کی گنجائش نہیں، ایسی بات کرنا غداری ہے
مختلف سوالات پر انہوں نے کہا کہ آئین پاکستان کے تحت ملک میں ٹیکنو کریٹ حکومت کی گنجائش نہیں ہے، ایسی باتیں کرنا ملک سے غداری ہے، سسٹم ڈی ریل نہیں ہونا چاہیے اسے چلتے رہنا چاہیے۔
گورنر سندھ نے اقتصادی رپورٹنگ کی اہمیت پر زور دیتے ہوئے کہا کہ سی پیک اور دیگر سرمایہ کاری کی اندرون اور بیرون ملک کانفرنسوں میں کراچی کے اقتصادی رپورٹنگ کرنے والے رپورٹرز کو بهی شامل کیا جائے گا۔
