کراچی: گورنر سندھ زبیر عمر کی بھتیجی شہباز شریف کے ساتھ والد کی تعزیت کے لیے آنے والے کارکنان پر برس پڑیں۔
تفصیلات کے مطابق شہباز شریف گورنر سندھ کے بھائی طارق عمر کے انتقال پر تعزیت کے لیے کارکنان کے ہمراہ ان کے گھر پہنچے اور تعزیت کا اظہار کیا۔
شہباز شریف کے ساتھ جانے والے کارکنان نے جب ن لیگ کے حق میں نعرے لگانے شروع کیے تو مرحوم طارق عمر کی صاحبزادی غصہ ہوگئیں، انہوں نے کہا کہ والد کا انتقال ہوا ہے یہاں نعرے نہ لگائیں، یہ میت کا گھر ہے یہاں کوئی جلسہ نہیں ہورہا ہے۔
- Advertisement -
شہباز شریف نے نواز شریف کی جانب سے بھی تعزیتی پیغام پہنچایا، گورنر سندھ زبیر عمر نے کلثوم نواز کی خیریت دریافت کی اور صحت یابی کے لیے دعا کی۔
واضح رہے کہ گورنر سندھ زبیر عمر اور تحریک انصاف کے رہنما اسد عمر کے بڑے بھائی اتوار کے روز کراچی میں طویل علالت کے بعد انتقال کرگئے تھے۔
