اسلام آباد: وفاقی حکومت نے 17 ستمبر کو عام تعطیل کا اعلان کردیا، اس دن تمام اسکولز، سرکاری اور نجی دفاتر بند رہیں گے۔
تفصیلات کے مطابق حکومت نے عید میلاد النبی (12 ربیع الاول) کے موقع پر چھٹی کا اعلان کردیا۔
کابینہ ڈویژن نے نوٹیفکیشن جاری کرتے ہوئے کہا کہ حکومت نے 17 ستمبر کو ملک بھر میں عام تعطیل کا اعلان کیا ہے، تمام اسکول، کالجز، سرکاری، نیم سرکاری اور نجی دفاتر بند رہیں گے۔
مرکزی رویت ہلال کمیٹی نے بدھ کے روز اعلان کیا تھا کہ اسلامی مہینے کا چاند نظر نہ آنے کی وجہ سے 12 ربیع الاول 17 ستمبر بروز منگل کو ہوگی۔
واضح رہے ماہ ربیع الاول امت مسلمہ کے لیے خاص اہمیت کا حامل ہے کیونکہ اس مہینے نبی آخرالزماں ﷺ کی دنیا میں آمد ہوئی، پیغمبر اکرم صلی اللہ علیہ والہ وسلم پوری دنیا کے لئے عملی نمونہ بن کر آئے اور وہ ہر شعبے میں اس اوج کمال پر فائز ہیں کہ ان جیسا کوئی تھا اور نہ ہی قیامت تک آسکتا ہے۔
