اسلام آباد : حکومت نے سحر و افطاراور تراویح کے اوقات میں لوڈ شیڈنگ نہ کرنے کا فیصلہ کرلیا اور تمام بجلی کی تقسیم کار کمپنیوں کو ہدایات جاری کردیں۔
تفصیلات کے مطابق وزیراعظم شہباز شریف کی جانب سے رمضان المبارک میں بجلی کی بلاتعطل فراہمی کی ہدایت کے بعد وزارت توانائی نے سحر و افطاراور تراویح کے اوقات میں لوڈ شیڈنگ نہ کرنے کا فیصلہ کرلیا۔
وزارت توانائی نے اس حوالے سے ملک کی تمام بجلی کی تقسیم کار کمپنیوں کو ہدایات جاری کردی ہیں۔
وزارت توانائی کا کہنا ہے کہ سحر وافطار اور تراویح کے اوقات میں بجلی کی فراہمی یقینی بنائی جائے ، سحر ا کے اوقات سے ایک گھنٹہ قبل اور ایک گھنٹہ بعد میں زیرو لوڈمینجمنٹ ہوگی۔
ہدایات میں کہا گیا کہ افطار کے اوقات میں ایک گھنٹہ قبل اور 3 گھنٹے بعد زیرولوڈمینجمنٹ ہوگی، بجلی کی بلاتعطل فراہمی کیلئے آپریشن سرکل کی سطح پر کنٹرول روم قائم ہوں گے۔
اس سلسلے میں ڈویژن،سب ڈویژن کی سطح پر شکایات کے ازالے کیلئے خصوصی ٹیمیں تشکیل دے دی گئی ہیں ، ٹرانسفارمرز خرابی کی صورت میں اضافی ٹرانسفارمراور ٹرالیاں دستیاب ہوں گی۔
