کیلیفورنیا : حکومت پاکستان نے فیس بک انتظامیہ سے اکاونٹس کی معلومات کے تبادلے کو بڑھانے کی درخواست دے دی۔
تفصیلات کے مطابق انتظامیہ نے اس بات کی تصدیق کی ہے کہ پاکستان کی جانب سے اکاونٹس کے ڈیٹا کی فراہمی کے حوالے سے درخواست دی گئی ہے جبکہ اس حوالے سے امریکہ اور بھارت خفیہ آئی ڈیز کی معلومات مانگنے والے ممالک میں سر فہرست ہیں ۔
جولائی سے دسمبر 2015 6 ماہ کے دوران پاکستان کی جانب سے 706 اکاونٹس کا ڈیٹا حاصل کرنے کا مطالبہ کیا گیا ہے۔ بڑھتی ہوئی تعداد کو مد نظر رکھتے ہوئے فیس بک کی انتظامیہ سے درخواست کی گئی ہے کہ معلوماتی تبادلے کی حد کو مزید بڑھایا جائے۔
سرکار کی جانب سے استدعا کی گئی ہے کہ صارف کے آئی پی ایڈریس، سمیت آئی ڈی کی تفصیلات اور ہونے والی پوسٹنگ تک رسائی دی جائے۔
واضح رہے سماجی رابطے کی ویب سائٹ پر دنیا بھر سے صارفین کی تعداد کروڑوں میں پہنچ چکی ہے ۔تعداد کو مدنظر رکھتے ہوئے فیس بک انتظامیہ کی جانب سےواضح کیا گیا ہے بڑھتی ہوئی عالمی درخواستوں کی پیش نظر یہ فیصلہ کیا گیا ہے کہ صارف کی معلومات کا تبادلے کا حتمی فیصلہ اتنظامیہ کی جانب سے کیا جائیگا۔
