اسلام آباد : ایران،عراق اور شام میں مقدس مقامات کی زیارت سے متعلق پالیسی تیار کرلی گئی، کراچی سے عراق فیری سروس شروع کی جائے گی۔
تفصیلات کے مطابق ایران،عراق اور شام میں مقدس مقامات کی زیارت سے متعلق پالیسی تیار کرلی گئی ، وزیرمذہبی امورکی سربراہی میں ذیلی کمیٹی نےپالیسی کو حتمی شکل دی، کمیٹی میں شیریں مزاری،علی زیدی،ندیم افضل چن،عاصم سلیم باجوہ شامل تھے۔
مجوزہ پالیسی کے مطابق زائرین اور ٹورآپریٹرز کو وزارت مذہبی امور میں رجسٹرڈ کیا جائے گا، کوئٹہ، تفتان میں زائرین کی رہائش کیلئے انتظامات کئے جائیں گے۔
پالیسی میں کہا گیا کوئٹہ تفتان روڈپرسروس ایریا تعمیرکئے جائیں گے، کراچی سےعراق فیری سروس شروع کی جائےگی جبکہ مستقبل میں گوادرسےعراق فیری سروس بھی شروع کی جائےگی، کراچی سےفیری سروس سے سفر کو سستا اور محفوظ بنایا جائے گا۔
زیارت پالیسی کا حتمی مسودہ کابینہ سے منظوری کیلئے پیش کیا جائے گا ، وفاقی وزیرمذہبی امورنورالحق قادری نے کہا کہ زائرین کی سہولت کے لیے جامع زیارت پالیسی بنارہےہیں، زائرین کی صحت وسہولت کوبطورخاص مدنظررکھاجائےگا۔
