اسلام آباد : گھریلو صارفین کے لئے گیس کے بلوں میں فکسڈ چارجز میں اضافہ کردیا گیا، قیمتوں میں اضافے کا اطلاق یکم جولائی سے ہوگا۔
تفصیلات کے مطابق وزیرخزانہ محمد اورنگزیب کی زیر صدارت اقتصادی رابطہ کمیٹی کا اجلاس ہوا، جس میں گھریلو صارفین کیلئےگیس کی قیمتیں برقرار رکھنے اور فکسڈ چارجز میں اضافے کا فیصلہ کیا گیا۔
ذرائع کا کہنا ہے پروٹیکٹڈ صارفین کے فکسڈ چارجز 400 سے بڑھا کر 450 روپے ماہانہ جبکہ نان پروٹیکٹڈ صارفین کے فکسڈ چارجز ایک ہزار سے بڑھا کر 1400 روپے کردیے گئے۔
ایک اعشاریہ پانچ کیوبک میٹر سے زائد گیس استعمال کرنے والوں کے فکسڈ چارجز 2 ہزار سے بڑھاکر 2400 روپے کردیے گئے۔
ذرائع کے مطابق گیس پر چلنے والے پاور پلانٹس اور صنعتی صارفین کے لیے قیمتوں میں دس فیصد اضافہ کی منظوری دے دی گئی۔
مزید پڑھیں : صارفین کو نئے گیس کنکشن دینے کا منصوبہ تیار
ای سی سی ذرائع کے مطابق قیمتوں میں اضافے کا اطلاق یکم جولائی سے ہوگا۔
اقتصادی رابطہ کمیٹی نے بلک صارفین اور اور بجلی گھروں کے لیے گیس کے نرخ میں 10 فیصد اضافے کی بھی منظوری دی۔
ای سی سی اجلاس میں 7 لاکھ 50 ہزار چھوٹے کاشتکاروں کیلئے قرض اسکیم کی منظوری دی گئی، 7 لاکھ 50 ہزار چھوٹے کاشتکاروں کیلئے قرض اسکیم کا اجرا 14 اگست کو کیا جائے گا، نئی قرض اسکیم سے مالی سال 2026 سے 2028 تک 3 سو ارب فنانسنگ ہو سکے گا۔
