اسلام آباد : وزیراعظم شہباز شریف کی ہدایت پر بارانِ رحمت کیلئے آج نماز استسقاء کے اہتمام کا سرکلر جاری کردیا گیا۔
تفصیلات کے مطابق وزیراعظم شہباز شریف کی جانب سے قوم سے باران رحمت کیلئے نماز استسقاء ادا کرنے کی اپیل کے بعد وزارت مذہبی امور نے سرکلر جاری کردیا۔
وزارت مذہبی امور نے آج نمازاستسقاءکے اہتمام کا سرکلرجاری کردیا، جس میں وفاقی اور صوبائی سطح پر نماز کا اہتمام کرنےکی ہدایت کی گئی ہے۔
سرکلر میں چاروں صوبوں، جی بی اور آزاد کشمیر کے سیکریٹری اوقاف کو عملدرآمد یقینی بنانے کی ہدایات جاری کی ہے۔
مراسلے میں کہا ہے کہ حالیہ خشک سالی سےملک بھرمیں صحت اوراسموگ کےمسائل پیداہورہے ہیں، مساجد کے پیش امام اورعوام مسنون صلاۃ الاستسقاء کا لازمی اہتمام کریں۔
وزارت مذہبی امور کا کہنا تھا کہ عوام اللہ رب العزت سے خصوصی مغفرت طلب کرتے ہوئے باران رحمت کی دعاکریں۔
مزید پڑھیں : وزیراعظم کی قوم سے نماز استسقا کی اپیل
یاد رہے گذشتہ روز وزیراعظم کا کہنا تھا کہ بارش برسنے سے ماحول میں بہتری آئے گی اور بیماریوں سے نجات ملنے میں بڑی مدد مل سکتی ہے، دعائیں کی جائیں تا کہ انسانی زندگی کو اس تکلیف سے نجات مل سکے۔
ان کا کہنا تھا کہ وفاق اور صوبوں کے زیر اہتمام تمام مساجد میں نماز استسقا کا اہتمام کیا جائے موجودہ صورت حال میں باران رحمت کی شدید ضرورت ہے۔
خیال رہے لاہور آج بھی دنیا کے آلودہ ترین شہروں میں سر فہرست ہے، دھند کے باعث حد نگاہ میں کمی کی وجہ سے ایئرپورٹ پر فلائٹ آپریشن متاثر ہے جبکہ موٹروے کے مختلف سیکشنز بھی ٹریفک کے لئے بند ہیں تاہم محکمہ موسمیات کے مطابق رات گئے ہلکی بارش کا امکان ہے۔
